Libros que deixaron pegada

Actividade proposta polo Equipo de Biblioteca do I.E.S. para o día do Libro -23 de abril-

Esta foi a idea máis suxestiva, na nosa opinión, dos Encontros de Sanxenxo para os responsables das Bibliotecas de Centros Escolares do Plan de Mellora, referida polo escritor Gonzalo Moure, tende a fomentar a curiosidade e o gusto pola lectura da Comunidade Educativa.
Para levala a cabo entregouse a cada titor dos primeiros cursos da E.S.O. o dobre de pegadas do alumnado que tiña, para seren recortadas polos rapaces e rapazas. Nunha delas figuraría o nome e curso destes, e aquel(es) libro(s) que exerceron nelas e neles unha influencia mais fonda (dende contos infantís ata o último que leran). (A outra, en branco, sería entregada ó alumnado de Bacharelato e ó Profesorado) Con todas elas faríamos un camiño dende a porta do Instituto ata a Biblioteca, o día 22 de abril, camiño que permaneceu aberto ata o día 5 de Maio.

Día do libro

“Libros que che deixaron pegada”
Agasallo: un libro por curso, de 1º a 3º de E.S.O. (sorteo);
Alumnado de 4º follas cun poema de Olalla Tuñas e a noticia biobibliográfica de Berta Dávila.
No encerado da Biblioteca, “Epitafio” de Juan Gelman.
“Solta” de libros, películas, etc. que profesorado do equipo de Biblioteca tiña duplicados na casa e que, envoltos en papel de regalo, apareceron por sorpresa un Mércores a 4º hora, para quedar en propiedade do alumnado que os atopara. Levouse a cabo na semana seguinte ó día do Libro.

Día dos mundos

Galicia, país tradicionalmente emigrante, está a recibir agora a xentes doutros países que buscan aquí traballo. Coidamos que o noso Centro, sempre atento á realización de viaxes que permitan ó alumnado coñecer a realidade doutros países, tiña nestes rapaces e rapazas, procedentes de lugares ben distantes unha fonte de enriquecemento cultural, e un modo de coñecer e aprender da diversidade de costumes.
E así, en colaboración cos pais e nais destes alumnos/as, realizamos unha exposición de obxectos, libros, música, paneis informativos e pratos de cociña elaborados por eles mesmos, que logo degustou toda a Comunidade Educativa: China, Exipto, Uruguai, Venezuela, Francia, Suíza, Bélxica, a India e Perú estiveron representados nunha xornada de confraternidade e descuberta de novas realidades. Alumnado e profesorado de todo o Centro visitou a exposición e degustou diversos pratos. Está actividade, que se iniciou o ano pasado, estendeuse este a outras comunidades autónomas españolas: Aragón e Castela-León.